04.10.2019

5 oktyabr-Beynəlxalq Müəllimlər Günü ilə əlaqədar tədbirlər keçirilib

Rayonun ümumtəhsil məktəblərində qarşıdan gələn 5 oktyabr-Beynəlxalq Müəllimlər Günü ilə əlaqədar tədbirlər keçirilib.

Təhsil müəssisələrində Beynəlxalq Müəllimlər Gününə həsr olunan mühazirə, şagirdlərin əl işlərindən ibarət sərgilər, rəsm, şeir, inşa müsabiqələri, bədii qiraət gecələri təşkil edilib.

Rayon Təhsil Şöbəsi əməkdaşlarının, yerli icra nümayəndələrinin, ziyalıların, məktəblərin pedaqoji kollektivinin, valideyn və şagirdlərin iştirak etdiyi tədbirlərdə bildirilib ki, həyata keçirilən kompleks tədbirlər nəticəsində müəllimlik rəqabətli bir peşəyə çevrilib və ümumilikdə müəllim peşəsinə olan maraq artıb. Həmçinin bu il ali məktəblərə qəbul imtahanı zamanı yüksək bal toplayan çox saylı abituriyent müəllim peşəsini seçib.

Tədbirlərdə həyatını xalqın işıqlı gələcəyinə həsr edən müqəddəs peşə sahiblərinin cəmiyyətimizə və gələcəyimizə verdiyi töhfələrdən də söhbət açılıb. Çıxış edən müəllimlər yaradılan geniş imkanlardan bəhrələnərək ölkəmizin gələcək inkişafı üçün yüksək təhsilli və savadlı gənclər yetişdirmək yolunda əllərindən gələni əsirgəməyəcəklərini söyləyiblər.

Həmçinin tədbirlərdə öz səmərəli fəaliyyəti ilə fərqlənən qabaqcıl müəllimlər təltif olunublar.

Şagirdlər müəllimlərə həsr olunmuş şeirlərdən parçalar səsləndirib, mahnılar ifa edib, ədəbi-bədii kompozisiyalar nümayiş etdiriblər.


Açar sözlər: ,  ,  ,